Морко ден Мишкан район коклаште кыл пеҥгыдемеш

28.03.07

Марий Элысе Морко район ден Пошкырт кундемысе Мишкан район коклаште келшымаш кÿвар ий гыч ийыш пеҥгыдем толеш. Тидыже поснак пытартыш ийлаште шижылтеш. Туныктышо-влак вашла паша опытышт дене палдараш коштыт, тÿвыра пашаеҥ-влак икте-весышт деке чÿчкыдын унала мият. Лÿмлö писатель, композитор-влакын шочмо кундемыштышт лÿмгечыштым пайремлыме годым морко ден мишкан марий-влак икте-весышт дене вашлийыт. Сабантуй, Пеледыш пайрем-влакым пырля эртарат. 

2008 ий 20 мартыште Морко районысо Коркатово школышто кумдан чапланыше марий драматург С. Н. Николаевын 100 ияш юбилейжым пайремлыме лÿмеш «Кугезе муро» театр-сылнымут пайрем эртен. Тиде пайрем вашеш 17 гыч 21 март марте театр коллектив-влакын фестивальышт эртен. Тиде фестивальышке Мишкан Тÿвыра полат пеленсе Марий калык театрымат ÿжыныт. 

Мемнан театр группым калык театрын вуйлатышыже Н. А. Ахмадеева ден историй-краеведений тоштерым вуйлатыше С. И. Салиева вуйлатеныт. Морко мландыш мийыше шкеыштык артист-влакын лÿмыштымат ончыктен кодаш кÿлеш, шонем. Тиде - театрын ветеранже-влак З. Р. Ямурзина ден Г. А. Айгильдин, туныктышо-влак Я. Е. Александров ден С. А. Мусалин, РДК-н методистше-влак М. В. Минилбаева ден О. А. Мусалина, студент-влак В. Я. Кутлуметов ден Н. В. Ахмадеева, РОО-н методистше И. Т. Саметова, йоча сымыктыш школышто туныктышо С. Е. Ямбаев. 

Морко мланде мемнам пеш порын вашлийын. Икымше кечыштак Марий самырык театрын «Айвика» спектакльжым ончышна. Спектакль деч вара самырык театрын артистше-влак дене вашлиймаш эртыш.Тиде театрын тÿҥ режиссержо, РФ сымыктышын сулло пашаеҥже О. Г. Иркабаев - мемнан землякна. Тудо Мишкан калык театрыштат икмыняр спектакльым шынден. Сандене тудын дене вашлиймаш пеш шокшын эртен. Тиде ганат Олег Геннадьевич артист-влакын мастарлыкыштым шуарыме шотышто мастер-классым эртарен. Тидыже мемнан шкеыштык артист-влаклан пеш кугу урок лийын. Ме тыгак Марий Элын калык артистше, шкенан землякна А. А. Андрианов дене вашлийынна. 

Вес кечынже мемнам Шоруньжа ялышке намийышт. Тиде ялыште ме М. Рыбаковын «Эргымлан кузык» пьесыж почеш ямдылыме спектакльым ончыктышна. Ялысе калык мемнан артист-влакым пеш шокшын вашлийын. Тиде кастенак Морко Тÿвыра полатыште ты спектакльым ончыктенна. Спектакль деч вара «Марий кас», Морко калык театрын артистше-влак дене вашлиймаш эртеныт. Морко театрым Анна Якушева вуйлата. Тудо шкежат пьесым воза. Мемнан театрын репертуарыштыжат А. Якушеван «Рекетир» пьесыже лийын. Сандене палыме автор дене шинчаваш мутланымаш пешак пайдалын эртен. Пытартышлан чылан эрвел кандырам куштымо. 

Кумшо кечын ме верысе краеведений тоштерыште лийынна. А 13 шагат кечывалым Коркатово школышто Сергей Николаевлан 100 ий темме лÿмеш «Кугезе муро» пайрем тÿҥалын. Тиде пайрем годым Марий Элысе журналче-влак - “Кугарня” газетын корреспондентше И. Ябердина, «Ямде лий!» газетын редакторжо Л. Семенова, «Марий Эл» газетын корреспондентше-влак Л. Иванова ден З. Глушкова, Писатель ушемын председательже В. В. Крылов, Марий Элын калык поэтше, артист, В. Регеж-Горохов, драматург, прозаик Л. Яндаков, МарНИИЯЛИ-н отдел вуйлатышыже Н. Н. Федосеева дене палыме лийынна. 

Пайрем деч вара Чавайнур ялыште С. Г. Чавайнын музейышкыже миенна. Чавайнын ешыжын илыме суртыштыжо лийынна. Тушто марий литературын классикшын илымыж годым пайдаланыме шуко арверже аралалтеш. Тоштер вуйлатыше О. В. Петров писатель нерген шуко оҥайым каласкален. 

Моркыш пöртылмö годым Чодраялыште верланыше «Тÿрлемÿдыр» студийыш пуренна. Тушто марий тÿр-влак дене палыме лийынна. 

Кастене ме М. Шкетан лÿмеш Марий кугыжаныш драме театрын артистше-влак дене вашлийынна. Ондак С. Николаевын «Салика» пьесыж почеш шындыме спектакльым онченна. 

Тиде вашлиймаште театрын директоржо Ю. П. Русанов, Морко район администраций вуйлатыше С. Х. Григорьев, тÿвыра пöлкам вуйлатыше А. А. Александров да моло-влакат лийыныт. 

Морко мландышке унала ÿжшö, мемнам чыла вере сайын вашлийше морко калыклан алал кумылын тауштена. 

Тора корныш коштын толаш йöным ыштыше Мишкан район администраций вуйлатыше В. М. Андреевлан, тÿвыра пöлкан начальникше Р. К. Ялаевалан, Мишкан калык театрын вуйлатышыже Н. А. Ахмадеевалан да мемнан спонсорна-влак С. С. Новиков ден О. А. Байрамовлан кугу таум калаена. 

Театрын артистше-влак лÿм дене

Важ: "Келшымаш" жаплышташ