Валерий Мочаевым кӧ кырен? Молан?

24.04.08

Эртыше кугарнян, 18 апрельыште, ныл-вич шагат эрдене марий калык национальный толкынын ик эн чолга еҥжым, "Марий Эл-радион" шеф-редакторжо Валерий Александрович Мочаевым, илыме пӧртшын подъездше ончылно палыдыме еҥ шучкын кырен… "Вуйгоҥгыраже шелын, шола вуйлеп лу тугын, вуйдорык эмганен" - тыгай диагноз дене тудым вигак Йошкар-Оласе эмлымверын реанимаций отделенийышкыже наҥгаеныт, операцийым ыштеныт, кызыт тудо больницыште эмлалтеш.

Шкат паледа, эртыше кечылаште Марий калыкын VIII Погынжо лийын, тудын дене кылдалтше вашлиймаш-влакым ятыр эртарыме. 

18 апрельыште Погынын делегатше-влакым вашлийме деч вара, Йошкар-Оласе "Фараон" клубышто марий дискотеке пытымеке, Валерий Александрович такси дене мӧҥгышкыжӧ кудал миен. Подъезд ончылно домофон дене пачержын номержым погымо годым тудын ӱмбаке палыдыме еҥ вучыдымын тӧршталтен, икмыняр гана вуйжым перен, эсогыл шӱтен… Пуйто Валерий Александровичын толмыжым вученак… 

- Кап-кыл кӱкшытшӧ мыйын гайрак, ӱмбалныже спортивный гайрак вургем, кидыштыже кастетла чучо. Эн тӱҥжӧ - мый йӧрлын омыл. Аралалташ веле огыл, мый тудын ваштареш шогалынам. Кредалмаште опытанла чучо, - ойла Валерий Александрович. 

Кидым нӧлталше еҥ ваштареш шогалаш тыршен гынат, вуйлан чот логалын. - Тушечын вӱр шыжен йогаш тӱҥалмым ужмеке гына садет, "сита" маншыла, арка велыш куржо, шыле. Тиде аркыже мемнан подъезд воктенак. Пӧрт сравочым театреш сумкаште коденам. А домофон пашам ыштен огыл улмаш, сандене ватем йыҥгыртымым колын огыл. Мом ышташ? Вӱр чарныде йога… - умбакыже шар¬налта Валерий Александрович. 

Пиалешыже, варажым ала-кӧ подъезд омсам кӧргӧ гыч почын, Валерий Александровичын пелашыже, тудым, вӱр вузыканым ужмеке, мутат уке, шинчавӱд деч посна вашлийын кертын огыл… 

Марий калыкын чолга еҥже ӱмбаке кӧ кидым нӧлталын? Молан? Кызытсе саманыште уремыште тӱрлӧ еҥ вашлиялтеш: содыки ты случайым кузе умылтарыман - Валерий Александрович осал шонымашан еҥын корнышкыжо логалын але содыки тиде еҥже тудын корныжым кычалын да, йӧнан татым вучен шуктымеке, ӱмбакыже кидым нӧлталын? Милиций пашаеҥ-влак тидын шотышто уголовный делам тарватеныт, титакан еҥым кычалын муыт манын, моткочак ӱшаныме шуэш. 

Г.Кожевникова

Важ: "Марий Эл" жаплышташ