Кудо / Мэр илыш / Артикль да интервью-влак /  

Тиде ешыште поро шÿлыш озалана
21.12.04

У Торъял районысо сылне олыкан, эҥеран Семисола ялыште Еруслановмытын кугу, чатка пöртым чоҥен шогалтымышт шуко нерген ойла. Конешне, тыгай сомыл ойлымо да шонымо семын ок ышталт. Чоҥымо материал шотышто ятыр пагыт амалкаленыт, вара окса шотышто нелылыкым шижын, ссудым налыныт. Пöртсийымат кужу жап вученыт. Тудыжым 1996 ийыште эртареныт. Кеч-мо гынат Нина Васильевна ден Виктор Валентинович волгыдо пöлемлаште илымыштлан куанат. Нунын дене ты пиалым кок ÿдырышт пайла.

Ачашт ден авашт коло ий ончыч вашлийме татым шарналтышт. Армий радам гыч пöртылшö рвезе ÿдырын шинчашкыже пернен. Такшым эрге-шамыч салтак вургем дене пеш моторын, йытыран койыт. А Витя (тудым тыге ялыште маныт) чурийвылыш денат, койыш-шоктыш денат сымыстарыше качымарий лийын. Санденак Киров область, Пижан районын Катканур ялеш шочын-кушшо да Торъял кундемыш ургызо сомылым шукташ толшо Нинан шÿм-чонышкыжо йöратымаш сескемым чÿктен. Таче ты тулын саскаже - кок вуеш шушо ÿдыр. Мийыме кечын ÿдыр-шамыч уке улыт ыле. Кугыракше, Елена, бухгалтер профессийым ойырен налын. Кызыт Йошкар-Оласе технологический колледжыште кокымшо ий тунемеш. Надежда У Торъял кыдалаш школын 10-шо классыштыже шинчымашым пога. Загсыш мийыме кечыштымат сÿретлышт. Тиде 1985 ий 22 ноябрьыште лийын. Вес ийын фарфор сÿан кечым пайремлаш тÿҥалыт.

Нина Васильевна латик ий верысе Быт пöртыштö тыршен, а вара тудым петырымек, паша деч посна кодын. Кызыт мöҥгыштак вольыкым онча, сурткöргысö моло сомылым ворандарен шога. А Виктор йÿштö велыш ынде нылымше ий коштеш, ешыш шийвундым конда. Тудо Афганистаныште 1984-86-шо ийлаште служитлымыж годым чолгалыкым, лÿддымылыкым ончыктен, санденак оҥ пеленже ныл медаль чолгыжеш. Поснак кугу сеҥымашыжлан "За Отвагу" медальым пижыктеныт. Тиде кочо татым мут дене шарналташ ыш тошт. Шуко жап шоналтен шинчыш, ушыштыжо эртышым видеофильмла пöрдыктыльö. Тунамсе шучко сар омешыжат конча, йÿдым кычкырен, тöрштенат кынелта. Йолышто вошт лекше сусыржат пеҥыжын, тидым шарныктара. В.Еруслановлан ик жап льготым пуэныт, ынде тудыжат уке.

А профессийже дене Виктор Валентинович - шофер. У Торъял СПТУ-м тунем лектын, ДОСАФ-ыште шинчымашым поген. Вара У Торъял ÿй да сыр заводышто, верысе Госстрахыштe, "Первый май" озанлыкыште водительлан тыршен.

Еруслановмыт ятыр нелылык гоч пырля эртеныт. Лач тыгай тÿшка вий гына илышыштына ончыко ошкылым ышташ полшен шога, мо кÿлешым йöнештара. Тек ты ешыште ончыкыжымат куан озалана да пиалан мужыр уныкан уныкажым ужеш. Нунылан тазалыкым, кинде перкем тыланена.

Эльвира Ендылетова

"Кугарня" газет. 17.12.2004 ий.

Кудо / Мэр илыш / Артикль да интервью-влак /